Il-Ministru għat-Turiżmu Jo Etienne Abela, ilu jservi bħala Ministru tal-Kabinett u Membru Parlamentari minn April 2022. Il-Ministru Abela kellu r-responsabbiltajiet għall-Anzjanità Attiva (minn April 2022 sa Jannar 2024) u Ministru għas-Saħħa u l-Anzjanità Attiva (minn Jannar 2024 sa Mejju 2026).
Dr Abela ssorvelja r-rinnovazzjoni sħiħa tal-Faċilità San Vinċenz de Paul, it-twaqqif ta’ sptar ta’ matul il-jum multidixxiplinari mgħammar u funzjonali bis-sħiħ fl-istess faċilità, it-twaqqif tal-Awtorità għall-Istandards tal-Persuni Anzjani (OPSA), it-tnedija ta’ għadd ta’ strateġiji għall-anzjanità attiva u s-saħħa, it-tlestija taċ-Ċentru Reġjonali Ċensu Moran, tiġdid sħiħ tal-Isptar Ġenerali t’Għawdex, tliet units ġodda ta’ kura b’dipendenza għolja u żewġ swali ġenerali ġodda fl-Isptar Mater Dei, it-trasformazzjoni tal-kura għad-dijabete tat-tip 1, it-tlestija tal-pjanijiet prinċipali għas-servizzi tas-saħħa għal Għawdex u għall-isptarijiet San Luqa/Karen Grech, it-tnedija tal-helpline ta’ emerġenza 1400 u t-tlestija tat-tenders għall-kunsinna ta’ provvisti mediċi permezz ta’ drones, kif ukoll għall-estensjoni tad-Dipartiment tal-Emerġenza tal-Isptar Mater Dei u ta’ unità psikjatrika akuta ġdida.
Imwieled f’Għawdex fl-1975, il-Ministru Abela rċieva l-edukazzjoni tiegħu f’Għawdex, Malta u r-Renju Unit. Huwa kirurgu professjonalment u jispeċjalizza f’kundizzjonijiet tal-parti ta’ fuq tal-passaġġ gastrointestinali u tal-frixa. Huwa nħatar konsulent f’Glasgow fl-2010 u rritorna Malta fl-2012. Fl-Isptar Mater Dei u fl-Isptar Ġenerali t’Għawdex, huwa introduċa u kien pijunier ta’ diversi proċeduri ġodda endoskopiċi, laparoskopiċi u robotiċi. Huwa trejner u edukatur imwettaq u jeżamina għall-Università ta’ Malta u għall-Bord Ewropew tal-Kirurġija Ġenerali u Vixxerali. Huwa rebbieħ tal-Midalja tad-Deheb tar-Royal College of Surgeons of Edinburgh.